حامد زيد - قصيدة السفينهقصائد واشعار >>حامد زيد >> السفينه

السفينه

قصيدة السفينه للشاعر

 السفينه

 

ضاقت وساع الفيافي والوعد متـن السفينـه



للطريق اللي دعاني بعد أمـان الله وأمانـه


لاتنادينـي وصونـي قلبـك الله لايهيـنـه



لايراهن في رجوعي لجل مايخسر رهانـه


ليه ما أرحل عن غرامك بعد ماذقت الغبينه



أذكريلي شي واحد يستحـق أقعـد عشانـه


قلب ماحن لوصالي مانـي بحاجـة حنينـه



وأشهد أنـه مايعـزر بالرفيـع الا هوانـه


الهـوى الغـدار حـد الله مابينـي وبينـه



والرجل لاخير فيه إن ماحفظ قدره وصانـه


واحدٍ مثلي اليا مـن حدتـه عوجـا سنينـه



ماشكى لقرب أبن ادم لوهو أقرب من أخوانه


يوم قلبـي ماعصـاك وماقدرتـي تذبحينـه



ليه خنتي فيه وأنتي معه من نفـس الديانـه


كان ذبحي بيدك أرحملي من اللـي تفعلينـه



وأن طلبتـك تذبحينـي ماذبحتينـي لعانـه


كل جرحٍ من جروحي تذكرينه .. تنكرينـه



كن مالك في نزيفه (يـد) خانـت بالأمانـه


ينزف الخافق تواضع لين لطختـي جبينـه



والا أنا ماكنت أبيها توصل لحـد الأهانـه


قلت من باب الميانـه صاحبـك وتعذبينـه



لعنبوك إرخي معاي أشوي ماصارت ميانـه


طعت عقلك يوم قيل إن العقل للبنـت زينـه



لكن الشرهه علي اللي كنت أحسب إنك تكانه


من بعد ماكنتي أنتي في حشاي أغلى سجينه



بوعدك بطلق سراحك وأتهمينـي بالأدانـه


وين رايح..؟ لأي دربٍ مايرجـع للمدينـه



ليه رايح..؟ لان قلبك ماترك قلبـي وشانـه


كيف أبنسى.؟ ربي اللي ملهم القلب السكينه



مثل ماعانه بقربك لانـوى فرقـاك عانـه


كان قاسي يجرح أطراف السكاكين السنينـه



مايطيح وبنتٍ مثلـك حبهـا هـزت كيانـه


والا أنا خابر خفوقـي مايمـد الا الثمينـه



وإن بغى يغيض الثريا قعد القمـرى وزانـه


مزعلٍ لجلك هنوفٍ رجت عقـول رزينـه



وإن تهادت بالطريق الجرهدي تزهر جنانه


جادلٍ كـن الجمـال قبالهـا كتـف يدينـه



والقمر لو شاورت له ينزح وتقعـد مكانـه


كانت أول من تحكم في فـروع الياسمينـه



وأن تعدتهن تثنـن خيزرانـه .. خيزرانـه


بعتها لجلك وصارت لأصغر أطرافك رهينه



وألا هي لفتة هدبها تغمـرك ثقـل ورزانـه


والخفوق اللي تغـذى مـن معـزة والدينـه



مشكلته إنه تعلق في زمـن ماهـو زمانـه


كل مازادت جراحه وأكتشف غلطة ضنينـه



صدقيه أن قال مابه شخص يستاهل حنانـه


يـوم نـادا يافلانـه مارضيتـي تسمعينـه



ليـن صـوت يافلانـه ,يافلانـه ,يافلانـه


كنت أشوفك زعفرانه تقرض الورد وتدينـه



يمكن أني ماقطفتك بس أشوفـك زعفرانـه


كنت أهاب البعد عنك وأطلبـك لاتذكرينـه



كان خوف من الفراق وخطوت الفرقا جبانه


وماقتنعت أن الخيانه للرجل تلـوي يمينـه



لين ماربي بعثك وذقت من طعـم الخيانـه


إسمحيلي..مابقـى فينـي مكـانٍ تطعنينـه



وأقبلي من جوف قلبي كل عطفـه وأمتنانـه


والله الله في عذابك بتركـك عينـك بعينـه



دلليـه ولايـرده عـن شقـاك إلا لسانـه


والا أنا قررت أسافر وأمتطي ظهر السفينـه



لأن مابه شي واحد يستحـق أقعـد عشانـه

 

قصيدة السفينه



 

[ الرئيسية :: الإحصائيات :: البحث :: أخبر صديقك :: اتصل بنا ]